36

لاہور باغوں اور پھولوں کا شہر ہے، باب لاہور شہر کی خوبصورتی میں اضافہ کرے گا،وزیراعلیٰ عثمان بزدار نے ٹھوکر نیاز بیگ پر باب لاہور منصوبے کا افتتاح کر دیا

لاہور(ٹیوٹرپاکستان) وزیر اعلیٰ پنجاب سردار عثمان بزدار کی خصوصی ہدایت پر لاہور کے داخلی و خارجی راستے ٹھوکرنیاز بیگ پر خیر مقدمی آرائشی گیٹ ”باب لاہور“ کی تعمیر مکمل ہو گئی ہے اوروزیراعلیٰ عثمان بزدار نے ٹھوکر نیاز بیگ پر بنائے گئے باب لاہور منصوبے کا افتتاح کیا- وزیر اعلی عثمان بزدار نے تختی کی نقاب کشائی کر کے منصوبے کا افتتاح کیا-

وزیر اعلی عثمان بزدار نے کہا کہ باب لاہور کی تعمیر سے دوسرے شہروں سے لاہور آنے والوں پر شہر کا خوشگوار تاثر قائم ہو گا۔لاہور باغوں اور پھولوں کا شہر ہے، باب لاہور شہر کی خوبصورتی میں اضافہ کرے گا۔منصوبے کے تحت ٹھوکر نیاز بیگ جنکشن کی ری ماڈلنگ بھی کی گئی ہے اورنہر کے ساتھ گرین ایریاز قائم کئے گئے ہیں۔سٹریٹ لائٹس، حفاظتی جنگلے اور آرائشی روشنیاں لگائی گئی ہیں۔ انہوں نے کہا کہ باب لاہور 130فٹ چوڑا اور 60فٹ بلند ہے اور اس کے دونوں اطراف سٹیل ورک سے درود شریف لکھا گیا ہے۔وزیر اعلی نے کہا کہ لاہور کو نئی شناخت دی ہے۔سابق حکمرانوں نے خوبصورت شہر کو تباہ کرنے میں کوئی کسر نہ چھوڑی۔ لاہور کے دیگر داخلی و خارجی راستوں کو بھی خوبصورت بنائیں گے۔وزیراعلیٰ عثمان بزدار کو منصوبے کے بارے میں بریفنگ دیتے ہوئے بتایا گیا کہ لاہور، اسلام آباد موٹروے اور لاہور ملتان موٹروے کے ذریعے آنے والی ٹریفک اس گیٹ سے گزر کر لاہور میں داخل ہورہی ہے۔تعمیراتی کام کے دوران ایک منٹ بھی ٹریفک نہیں روکی گئی۔ ٹھوکر نیاز بیگ فلائی اوور کے نیچے سے تجاوزات کا خاتمہ کر دیا گیا ہے۔صوبائی وزیر ہاؤسنگ میاں محمود الرشید، اراکین پنجاب اسمبلی سعدیہ سہیل رانا، نذیر چوہان، وائس چیئرمین ایل ڈی اے شیخ محمد عمران، ڈائریکٹر جنرل ایل ڈی اے احمد عزیز تارڑ، ایل ڈی اے کی گورننگ باڈی کے ممبر انجینئر عامر ریاض قریشی، ایڈیشنل ڈائریکٹر جنرل فارقلیط میر، قدیر باجوہ اور چیف انجینئر ایل ڈی اے عبد الرزاق چوہان نے تقریب میں شرکت کی-

اس خبر پر اپنی رائے کا اظہار کریں

اپنا تبصرہ بھیجیں