10

نواب شاہ: آصف زرداری کی والدہ سپردِ خاک

سندھ کے شہر نواب شاہ میں سابق صدر آصف علی زرداری کی والدہ زریں آراء بخاری کی نمازِ جنازہ زرداری ہاؤس میں ادا کر دی گئی۔

خاندانی ذرائع کے مطابق آصف زرداری کی والدہ کی نمازِ جنازہ کی ادائیگی کے بعد انہیں آبائی قبرستان میں بالو جا قبا میں سپردِ خاک کر دیا گیا۔

نمازِ جنازہ میں آصف علی زرداری، پوتے بلاول بھٹو زرداری، خاندان اور پارٹی سے تعلق رکھنے والے دیگر افراد، ایم کیو ایم پاکستان کے سربراہ ڈاکٹر خالد مقبول صدیقی نے شرکت کی۔

اس سے قبل مرحومہ زریں آراء بخاری کی تدفین میں شرکت کے لیے ان کے پوتے وزیرِ خارجہ بلاول بھٹو زرداری، پوتیاں آصفہ بھٹو زرداری، بختاور بھٹو زرداری، بیٹیاں فریال تالپور، ڈاکٹر عذرا پیچوہو، خاندان کے دیگر افراد اور پارٹی رہنما کراچی سے خصوصی پروازوں سے نواب شاہ پہنچے۔

ذرائع کے مطابق بیگم زریں آراء بخاری کئی ہفتوں سے علیل تھیں اور کراچی کے ایک اسپتال میں زیرِ علاج تھیں۔

واضح رہے کہ آصف علی زرداری کے والد معروف سیاستدان مرحوم حاکم علی زرداری نے 2 شادیاں کی تھیں، ان کی بیگمات کے نام بلقیس بیگم اور زریں آراء بخاری تھے۔

حاکم علی زرداری کا انتقال 2011ء میں ہوا تھا، وہ 1972ء سے 1977ء، 1988ء سے 1990ء اور 1993ء سے 1996ء تک 3 مرتبہ رکنِ قومی اسمبلی رہے۔

اس خبر پر اپنی رائے کا اظہار کریں

اپنا تبصرہ بھیجیں