50

پی آئی اے کا مدینہ کے لیے قبل از حج آپریشن مکمل

قومی ایئرلائن پی آئی اے کا مدینہ کے لیے قبل از حج آپریشن مکمل ہوگیا۔ جدہ کے لیے آپریشن کا آغاز آج سے ہوگا۔

پی آئی اے کے ذرائع کے مطابق مدینہ کے لیے آپریٹ کی گئی پروازوں کے ذریعے 8800 عازمین حج کو مدینہ منورہ پہنچایا گیا ہے۔

ذرائع نے مزید بتایا کہ مدینے کے لیے مکمل ہونے والے حج آپریشن میں عازمین حج کا تعلق سرکاری حج اسکیم سے ہے۔

سرکاری حج اسکیم کے عازمین حج کو جدہ پہنچانے کے لیے قومی ایئرلائن سمیت ملک کی نجی ایئرلائنز بھی آپریشن کا آج سے آغاز کر رہی ہیں۔

قومی ایئرلائن کی سرکاری حج اسکیم کے تحت جدہ کے لیے پہلی پرواز آج لاہور سے روانہ ہوگی۔ جدہ کے لیے پہلی حج پرواز کے ذریعے 329 عازمین حج سعودی عرب روانہ ہوں گے۔

ذرائع کا کہنا ہے کہ آج ملتان سے ایک پرواز کے ذریعے 307 عازمین حج جدہ روانہ ہوں گے۔ ملتان سے جدہ کی پرواز کی روانگی آج رات 11:45 پر مقرر ہے۔

ذرائع کے مطابق کراچی سے جدہ کے لیے 329 عازمین حج پر مشتمل پہلی پرواز جمعہ کو علی الصبح 3 بجے روانہ ہوگی۔ جمعہ کے روز ہی کراچی سے پی آئی اے کی دوسری پرواز 393 عازمین حج کو لے کر شام 6 بجے روانہ ہوگی۔

اس خبر پر اپنی رائے کا اظہار کریں

اپنا تبصرہ بھیجیں