آئی سی سی چیمپئنز ٹرافی کے پانچویں میچ میں بھارت نے پاکستان کو 6 وکٹوں سے شکست دے دی۔

چیمپئنز ٹرافی نے بھارت سے یکطرفہ مقابلے کے بعد شکست ، گرین شرٹس کی سست بیٹنگ، بے اثر بولنگ، ناکارہ فیلڈنگ، پاکستان ٹیم تمام شعبوں میں ناکام ، اب ملبہ کس پر گرے گا؟ دعوے دھرے کے دھرے رہ گئے،لاکھوں شائقین کے دل ایک بار پھر ٹوٹ گئے ، بیٹنگ لائن کی ناقص کارکردگی، پاکستانی بولنگ 242رنز کا دفاع نہ کرسکی، کوہلی کی سنچری نے پاکستان کو چیمپئنز ٹرافی سے باہر ہونے کے دہانے پردھکیل دیا، انڈیا نے ہدف 45گیندیں پہلے ہی حاصل کرلیا، محمد رضوان اور سعود شکیل کے آوٹ ہونے کے بعد کوئی بیٹر سہارا نہ دے سکا، خوش دل اور سعود شکیل نے اہم کیچز چھوڑ کر میچ میں کم بیک کے مواقع گنوائے، بھارت کی جارحانہ بیٹنگ ۔ پلیئر آف دی میچ ویرات کوہلی نے چوکا مارکر اپنی سنچری مکمل کی اور بھارت کو پاکستان کے خلاف چھ وکٹ سے شکست دے کر سیمی فائنل کی جانب پیش قدمی جاری رکھی۔پاکستانی کرکٹ ٹیم کا سیمی فائنل میں کوالی فائی کرنے کا خواب شرمندہ تعبیر ہوتا دکھائی نہیں دے رہا ہے۔بھارت نے گذشتہ آٹھ میں سے چھ ون ڈے میچوں میں پاکستان کو شکست دی ہے۔دفاعی چیمپین روایتی حریف کے خلاف مزاحمت کرنے میں ناکام رہی۔بھارت نے اچھی بولنگ کے بعد جارحانہ بیٹنگ کے ساتھ پاکستانی بولنگ کو بے اثر کردیا ۔چیمپین بیٹسمین ویرات کوہلی نے پاکستان کے خلاف ایک اور میچ وننگ اننگز کھیل کر پاکستان کی امیدوں پر پانی پھیر دیا۔انہوں نے ون ڈے میں 51ویں سنچری111گیندوں پرسات چوکوں کی مدد سے بنائی۔ شریاس ائیر 56 رنز بناکر کیچ آوٹ ہوگئے۔انہوں نے67گیندیں کھیلیں جس میں ایک چھکا اور پانچ چوکے شامل تھے۔اکسر پٹیل تین رنز بناکر ناٹ آوٹ رہے۔شاہین آفریدی نے 74رنز دے کر دو وکٹ حاصل کئے۔دبئی کرکٹ اسٹیڈیم میں ٹاس جیت کر بھارت کے خلاف پہلے بیٹنگ کرتے ہوئے پاکستانی ٹیم 50 اوورز بھی پورے نہیں کھیل سکی، پوری قومی ٹیم 2 گیندیں قبل ہی 241 رنز پرآوٹ ہوگئی۔ پاکستان کی جانب سے سعود شکیل 64 رنز بناکر نمایاں رہے۔ایک موقع پر جب محمد رضوان اور سعود شکیل کریز پر موجود تھے لگ رہا تھا کہ پاکستان بڑ اا سکور کرنے میں کامیاب ہوجائے گا۔دونوں اوپر تلے آوٹ ہوئے پھر کوئی بیٹر سہارا نہ دے سکا۔خوش دل اور سعود شکیل نے دو انتہائی اہم مواقع پر کیچز چھوڑ کر میچ میں کم بیک کرنے کے مواقع گنوائے۔ کپتان روہت شرما اور شبمن گل نے ٹیم کا جارحانہ آغاز فراہم کیا، روہت 15 گیندوں پر 20 رنز بنانے کے بعد شاہین آفریدی کے ہاتھوں بولڈ ہوگئے۔ شبمن گل اور ویرات کوہلی نے تیزی سے رنز بنانے کا سلسلہ جاری رکھا، 68 رنز کے مجموعی اسکور پر حارث رؤف کی بولنگ پر خوشدل شاہ نے شبمن گل کا کیچ چھوڑا، وہ 35 رنز پر بناچکے تھے۔تاہم، ابرار احمد نے شبمن گل کو 46 رنز پر بولڈ کرکے ان کی نصف سینچری بھی مکمل نہ ہونے دی، اس دوران ویرات کوہلی نے حارث رؤف کو چوکا رسید کرکے ون ڈے انٹرنیشنل میں اپنے 14 ہزار رنز مکمل کیے۔پاکستان کی جانب سے 159 رنز کے مجموعی اسکور پر شریاس ایئر کو ایک موقع دیا گیا جب وہ 25 رنز پر بیٹنگ کررہے تھے، اس بار خوشدل شاہ کی باؤلنگ پر سعود شکیل نے کیچ چھوڑا۔قبل ازیں میچ کے نویں اوور میں بابر اعظم 23 رنز بناکر ہاردک پانڈیا کی گیند پر وکٹ کیپر کے ایل راہل کے ہاتھوں کیچ آؤٹ ہوگئے۔وہ پراعتماد دکھائی دے رہے تھے اور پانچ چوکے مارے لیکن پھر ہمت ہار گئے۔پہلی وکٹ 41رنز پر گری۔اگلے ہی اوور میں فخر زمان کی جگہ ٹیم میں شامل کیے گئے اوپنر امام الحق غیرضروری رن لینے کی کوشش میں اکشر پٹیل کی تھرو پر رن آؤٹ ہوگئے، وہ 26 گیندوں پر صرف 10 رنز بناسکے۔محمد رضوان کو 44 رنز پر ایک موقع ملا جب ہرشت رانا نے ہاردک پانڈیا کی گیند پر ان کا کیچ چھوڑا تاہم وہ اگلے اوور کی پہلی ہی گیند پر اکشر پٹیل کے ہاتھوں 46 رنز پر بولڈ ہوگئے۔انہوں نے77گیندیں کھیلیں اور تین چوکے مارے۔محمد رضوان کی طرح سعود شکیل کو بھی ایک چانس ملا جب اکشر پٹیل کی گیند پر کلدیپ یادو نے ان کا کیچ چھوڑا، تاہم وہ اگلے ہی اوور میں پانڈیا کا شکار بن گئے، سعود 62 رنز کی اننگز کھیلنے کے بعد آؤٹ ہوئےانہوں نے پانچ چوکے مارے اور76گیندیں کھیلیں۔دونوں سیٹ بیٹرز کے آؤٹ ہونے کے بعد پاکستانی بیٹنگ لائن سنبھل نہ سکی اور یکے بعد دیگر کھلاڑیوں کے پویلین واپس لوٹنے کا سلسلہ جاری رہا، طیب طاہر 4، شاہین آفریدی صفر، سلمان علی آغا 19، نسیم شاہ 14، حارث رؤف 8 رنز بناکر آؤٹ ہوئے۔بھارتی اسپنر کلدیپ یادیو نے40رنز دے کر تین وکٹ حاصل کئے۔ہارک پانڈیا نے31رنز کے عوض دو کھلاڑیوں کو آوٹ کیا۔ہرشت رانا،اکسر پٹیل اوررویندرا جڈیجا نے ایک ایک وکٹ حاصل کی