پنجاب سینٹرل بزنس ڈسٹرکٹ ڈیولپمنٹ اتھارٹی (پی سی بی ڈی ڈی اے)، جسے سینٹرل بزنس ڈسٹرکٹ پنجاب (سی بی ڈی پنجاب) کے نام سے بھی جانا جاتا ہے، نے والٹن روڈ اور سی بی ڈی روٹ 47 پر جدید ترین ڈرینیج سسٹم کامیابی سے نافذ کر کے ایک اہم انفراسٹرکچرل سنگِ میل عبور کر لیا ہے۔ یہ جدید نظام شہری سیلاب اور نکاسی آب کے دیرینہ مسائل، خاص طور پر والٹن روڈ پر گزشتہ کئی دہائیوں سے موجود چیلنجز کا مؤثر حل ثابت ہوا ہے۔
گزشتہ 30 سالوں میں پہلی بار ایسا ہوا ہے کہ حالیہ پری-مون سون بارش، جس میں لاہور میں 58 ملی میٹر بارش ریکارڈ کی گئی، کے دوران والٹن روڈ پر پانی کھڑا نہیں ہوا۔ نئے ڈرینیج سسٹم نے اپنی افادیت کو ثابت کیا، جس کی بدولت والٹن روڈ اور سی بی ڈی روٹ 47 پر ٹریفک رواں دواں رہی اور آمدورفت میں کوئی خلل نہیں آیا۔
سی بی ڈی پنجاب کا تیار کردہ یہ جدید ڈرینیج سسٹم بارش کے پانی کو مؤثر انداز میں سی بی ڈی جھیل کی طرف منتقل کرتا ہے، جس سے پانی کے جمع ہونے کا خطرہ ختم ہو گیا اور اردگرد کی آبادیاں محفوظ رہیں۔ یہ اقدام سی بی ڈی پنجاب کے اُس وژن کا حصہ ہے جس کے تحت وہ شہری انفراسٹرکچر کو جدید، پائیدار اور اسمارٹ سٹی ماڈل کے مطابق ترقی دے رہا ہے۔
اس منصوبے کی کامیابی پر گفتگو کرتے ہوئے سی ای او سی بی ڈی پنجاب، عمران امین نے کہاکہ”والٹن روڈ پر نکاسی آب کے 30 سال پرانے مسئلے کو حل کرنا سی بی ڈی پنجاب کی اولین ترجیح تھی۔ ہم پائیدار شہری انفراسٹرکچر کی ترقی کے لیے پُرعزم ہیں جو موجودہ ضروریات کو پورا کرنے کے ساتھ ساتھ مستقبل کو بھی محفوظ بنائے۔ حالیہ بارشوں کے دوران ڈرینیج سسٹم کی کامیاب کارکردگی ہماری منصوبہ بندی، عملدرآمد اور عزم کا منہ بولتا ثبوت ہے۔”
یہ کامیابی لاہور کے شہری منظرنامے کی بہتری میں سی بی ڈی پنجاب کے بڑھتے ہوئے کردار کو اجاگر کرتی ہے، جو جدید شہری ترقی اور مؤثر بلدیاتی حل فراہم کر رہا ہے۔ رہائشیوں، روزمرہ سفر کرنے والوں اور کاروباری طبقے نے اس تبدیلی کو سراہا ہے، کیونکہ کبھی پانی میں ڈوبی رہنے والی والٹن روڈ اب ترقی اور شہری بہتری کی علامت بن چکی ہے۔
یہ سنگِ میل اس بات کی عکاسی کرتا ہے کہ سی بی ڈی پنجاب ایک جدید، عوام دوست اور مؤثر طرزِ حکمرانی پر مبنی پنجاب کی تعمیر کے عزم پر کاربند ہے۔
